“Duajt” e Monet, shifër rekord në ankand – Shitet për 110 milionë dollarë
Katalogu i mbrëmjes së artit impresionist dhe modern, i propozuar nga Sotheby’s më 14 maj në New York, i tejkaloi pritshmëritë, duke gjeneruar rreth 350 milion dollarë të ardhura, përtej vlerësimit prej 333 milionë dollarësh pas shtimit të komisioneve. Kjo shumë marramendëse u arrit me vetëm 5 vepra të pashitura nga 55 të ofruara në total.
Pothuajse një e treta e të ardhurave totale të mbrëmjes u arrit me vetëm një vepër, një nga kompozimet e famshme të Claude Monet që përmban mullarë, titulluar “Meules” e vitit 1890. Ajo është pjesë e një serie prej 25 veprave me të njëjtën temë, të gjitha të pikturuara në mes të 1890 dhe 1891, nga të cilat vetëm tetë mbeten në duar private. Pamja përshkruan një fushë të ndriçuar nga dielli, ku spikatin dy duaj gruri me tonalitete në ngjyrë vjollce dhe blu.
Kërkesa e lartë e ka çuar veprën të dyfishojë vlerën e saj fillestare prej 55 milionë dollarë, duke u ndalur në 110.7 milionë me komisione. Monet kështu i bashkohet ‘klubit’ të vogël të artistëve që kanë kaluar pragun e 100 milionë dollarëve, duke sjellë për herë të parë një vepër impresioniste përtej kësaj vlere.
Puna e Monet ishte pjesë e një koleksioni prej tetë veprash të shitura për qëllime bamirëse, të gjitha të garantuara nga shtëpia e ankandit dhe në disa raste edhe nga palë të treta. Koleksioni arriti të sillte në fund një total prej 129.5 milion dollarë.
Burimi: Ilsole24ore
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.