Duhani, problem për turizmin në Greqi – Bishtat e cigareve mbulojnë plazhet, shqetësojnë pushuesit

Konsumi i duhanit po kthehet në një problem kritik për plazhet e Greqisë. Numri i pafund i bishtave të cigareve që hidhen në plazhet dhe rrugët e Greqisë, po shqetëson njerëzit që duan të mbrojnë mjedisin dhe shëndetin e tyre.

Në një plazh në jug të Athinës, shumë pushues janë parë duke tymosur ndërkohë që vëzhgonin detin dhe perëndimin. Pjesa më e madhe e tyre i lënë bishtat e cigareve në rërë, ku janë të dallueshme për të gjithë.

Pirja e duhanit në vende publike është e ndaluar në Greqi dhe ligji kundër duhanit është në fuqi prej 7 vitesh.

Megjithatë, kjo nuk i ndalon vizitorët që të tymosin e ti lënë bishtat e cigareve nëpër plazhe. Sipas qendrës greke për kancerin (GCS), thuajse 22 miliardë bishta cigaresh, që arrijnë në 3,500 tonë,  janë lënë nga duhanpirësit në vende publike në Greqi, ndërkohë që gjysma e kësaj shifre rezulton në bregdet.

Qendra i bën thirrje tymuesve që të mos i lënë bishtat e cigareve nëpër plazhe, por të paktë janë ata që i mbledhin, e i hedhin nëpër kosha.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.