Dyfishohen shpenzimet për pagesën e papunësisë – Në 2 muaj, buxheti pagoi 175 milion lekë, nga 87 milion lekë që u paguan 1 vit më parë

Shpenzimet nga buxheti i shtetit për pagesën e papunësisë u dyfishuan për 2- mujorin e parë të vitit 2021, në raport me të njëjtën periudhë të një viti më parë, duke reflektuar humbjen e vendeve të punës përgjatë epidemisë së shkaktuar nga COVID-19. Të dhënat raportohen zyrtarisht nga Ministria e Financave dhe Ekonomisë, sipas së cilës për periudhën janar-shkurt të këtij vit u shpenzuan 175 milion lekë për pagesën e papunësisë, nga 87 mln lekë që u paguan përgjatë 2-mujorit të parë të 2020-ës. Sipas të njëjtave të dhëna, shuma e paguar është 2-fish më e lartë edhe në raport me parashikimet buxhetore, duke qenë se për këtë zë ishin planifikuar vetëm 88 mln lekë.

Edhe shifrat e fundit të disponueshme nga Instituti i Statsitikave në vend nxorën në pah rritjen e numrit të personave të papunë në vend. Sipas këtyre statistikave, në fund të vitit 2020 numri i të punësuarve në vend ishte 1.23 mln, nga 1.27 mln që ishte në fund të vitit 2019, duke reflektuar një rritje me 40 mijë të numrit të të papunëve në vend. Për të reduktuar shifrat e papunësisë që prodhoi pandemia COVID-19, qeveria vuri në dispozicion tre programe punësimi, 4, 8 dhe 12-mujore më qëllim reduktimin e kostove të biznesit dhe nxitjen e tyre për të marrë staf të ri. Kështu, qeveria mori përsipër subvencionimin e kontributeve shoqërore dhe shëndetësore në masën 100 për qind për të gjithë periudhën e kohëzgjatjes, për të tre programet, ndërsa ofron edhe pagën minimale për dy programet e para.

Por, mesa duket këto paketa nuk kanë qenë të mjaftueshme për të ndikuar në uljen e papunësisë në vend. Sipas legjislacionit në fuqi, të drejtën për të përfituar pagesë papunësie e kanë të gjithë personat e siguruar, ndërkohë që kohëzgjatja e përfitimit varet nga periudha që çdokush ka derdhur kontribute të sigurimeve shoqërore. Kështu, për personat me periudhë kontributi 1 vit, do të merret 3 muaj asistencë, për ata që kanë derdhur kontribute 3 vjet përfitohet 6 muaj asistencë, ndërsa për ata që kanë të paktën 5 vjet sigurime do të përfitohet për një periudhë 9-mujore. Ndërkohë që, ata persona që kanë paguar mbi 10 vjet sigurime do të përfitojnë asistencën për një periudhë 1-vjeçare. Masa e nivelit bazë të së ardhurës nga papunësia për çdo përfitues është 50% e pagës minimale në shkallë vendi, që do të thotë 15 mijë lekë.

GRAFIK

SHPENZIMET PËR PAGESËN E PAPUNËSISË

2-MUJORI 2020             87 MLN LEKË

2-MUJORI 2021             175 MLN LEKË

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.