e-Albania, 127 mijë aplikime për certifikata gjatë muajit Maj – Ja shërbimet e tjera më të përdorura

Platforma online e shërbimeve për qytetarët, e-Albania, ka regjistruar gjatë muajit Maj 325,687 shërbime të përdorura nga përdoruesit e regjistruar të portalit.

Pjesa më e madhe e shërbimeve të përdorura ka të bëjë me certifikatat familjare dhe personale, të cilat pas reformës së uljes së numrit të dokumenteve të kërkuara nga institucionet shtetërore  tashmë merren online. Mbi 102 mijë herë është përdorur shërbimi i certifikatës familjare nga portali dhe aplikacioni mobile, ndërsa shërbimi i certifikatës personale është përdorur mbi 24 mijë herë.

Nga 1,341 shërbimet e ofruara nga e-Albania, më të përdorurat janë edhe ai për gjenerimin e kartës së shëndetit me mbi 30 mijë përdorime gjatë muajit të kaluar; vërtetimi për pagimin e kontributeve për individin dhe aplikimi për leje ndërtimi.

Në Maj janë regjistruar gjithashtu 26,409 përdorues të rinj që tashmë përfitojnë nga ky shërbim, ndërsa aplikacioni mobile ka arritur një numër prej mbi 16 mijë përdoruesish.

Shumë të përdorura janë gjithashtu edhe shërbimet e ofruara nga Ministria e Punëve të Jashtme, për emigrantët që jetojnë jashtë vendit, si aplikimi për pasaportë dhe kartë identiteti, aplikimi për leje kalimi, aplikimi për prokurë të posaçme, aplikimi për vizë, leje martese, etj.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.