E-Albania – Ja shërbimet më të përdorura dhe numri i aplikimeve për tetorin

Gjatë muajit tetor portali qeveritar e-Albania ka regjistruar mbi 1.9 milionë vizita, ndërsa janë regjistruar 23 879 përdorues të rinj. Nga të dhënat statistikore të publikuara për periudhën 1 deri më 31 tetor, ashtu si në muajt e mëparshëm, certifikatat familjare vijojnë të mbeten edhe shërbimi më i përdorur me 11 802 aplikime.

Ndërkohë, ky shërbim elektronik ndiqet nga vërtetimi për pagimin e kontributeve për individin me mbi 63 mijë aplikime si dhe nga aplikimet për kartë shëndeti, konkretisht me 43 136.

Po ashtu, në listën me numrin më të madh të aplikimeve listohen edhe shërbime të tjera online, si: certifikatat personale, deklarimi dhe pagesa e kontributeve, vërtetim për pagim detyrimesh, etj.

Sa i takon shërbimeve më të përdorura të Ministrisë së Punëve të Jashtme për tetorin, bazuar në statistikat mujore rezulton se aplikimi për pasaportë dhe kartë identiteti qëndron në krye të listës me 4752 aplikime, ndjekur nga aplikimi për prokurë të posaçme me mbi 1200 dhe ai për leje kalimi me 1133 përdorime. Ndërsa, bazuar në statistikat e publikuara, total numri i shërbimeve elektronike të përdorura rezulton 477 854.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.