E-Albania publikon shifrat – Shërbimet elektronike më të përdorura nga qytetarët gjatë muajit shkurt
Mbi 326 mijë shërbime elektronike janë përdorur gjatë muajit shkurt të këtij viti në portalin e-Albania. Sipas të dhënave të publikuara nga portali, gjatë kësaj periudhe rezulton se janë regjistruar më shumë se 28 mijë përdorues të rinj.
Certifikatat familjare kryesojnë listin si një nga shërbimet më të përdorura me 109 533 përdorime për muajin shkurt., ndjekur nga vërtetimi për pagimin e kontributeve për individin dhe certifikatat personale.
Sa i takon përdorimit të shërbimeve në Ministrinë e Punëve të Jashtme, gjatë muajit shkurt aplikimi për pasaportë dhe kartë identiteti me 5896 është edhe shërbimi më I përdorur. Pas tij renditet aplikimi për legalizimin e dokumenteve të lëshuara nga institucionet e huaja me 2031, ndjekur nga aplikimi për leje kalimi me 1828.
Ndërkohë, certifikatat familjare, deklarimi dhe pagesa e kontributeve nga punëdhënësit si dhe faturat e energjinë elektrike janë tre nga shërbimet më të përdorura gjatë muajit të kaluar në aplikacionin mobile.
Krahasuar me muajin janar të këtij viti, shërbimet elektronike të përdorura nga qytetarët ka shënuar një rënie me më shumë se 82 mijë shërbime të përdorura. Rënie kanë shënuar edhe përdoruesit e rinj të regjistruar në portal, me 6426 më pak se gjatë muajit janar.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.