E ardhmja e transportit urban? – Citroen: Do jetë makinë e vogël, smart, me qira dhe elektrike
Prodhuesi francez, Citroen, prezantoi një makinë tejet të vogël elektrike në shfaqjen në Gjenevë, për të cilën kompania bëri të ditur se do të anashkalojë ndalimin në qendrat e qyteteve. Sebastien Grandmougin, manaxher produkti i Citroen, tha se makina nuk ngjan fare si e tillë, pasi me 2.5 metra e gjatë, 1.5 metra e gjerë dhe 1.5 e lartë, duket si një kub i vogël që mund të përdoret pa patentë, nga çdo 16-vjeçar e sipër.
Sipas tij, modeli Ami One, përfaqëson vizionin e Citroen për të ardhmen e transportit urban dhe kompania synon të revolucionarizojë transportin në qytet në të njëtën mënyrë si ç’bëri me modelin 2CV në Francë në vitin 1948.
“Për të hapur derën, unë thjesht nxjerr smartphone-in tim dhe e afroj te barkodi, që do e hapë automatikisht. Ndërsa jam brenda, unë vendos telefonin diku dhe do të shoh në dritare informacionin që lidhet me udhëtimin tim: navigimin, muzikën apo shërbime si gjetjen e stacioneve të karikimit apo vendet ku dua të shkoj.”
Citroen synon ta ofrojë makinën me qira dhe jo ta shesë te përdoruesit individualë. Ky koncept përfaqëson një alternativë ndaj transportit kolektiv brenda qyteteve dhe ndaj transportit individual si biçikletat, motoçikletat apo të gjithë automjetet me 2-3 rrota. Për momentin, Ami One është ende një koncept, por kreu ekzekutiv i Peugeot Citroen, tha se do të prodhohet duke u bazuar te kërkesa.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.