“E ardhmja është në duart tuaja” / BE do të sjellë platformën e qytetarëve
Përgatitjet vazhdojnë për Konferencën për të ardhmen e Evropës e cila nga 19 Prilli do të llogarisë gjithashtu në një platformë dixhitale të hapur për të gjithë me moton “E ardhmja është në duart tuaja”. Kjo do t’u japë qytetarëve evropianë mundësinë për të shprehur pikëpamjet e tyre për çdo temë që ata e konsiderojnë të rëndësishme në gjuhën e tyre dhe për herë të parë ata do të jenë në gjendje të propozojnë idetë e tyre, të komentojnë ato të të tjerëve dhe të krijojnë ngjarje falë një harte.
Do të ketë një sistem të zhvilluar për menaxhimin e kontributeve dhe informacionin e azhurnuar mbi punën e Konferencës.
“Me këtë platformë ne ofrojmë mjetet për t’i dhënë mundësinë të gjithëve që të përfshihen në mënyrë aktive në këtë debat dhe ne do të sigurojmë që këto ide të futen në analizat dhe konkluzionet e Konferencës,” tha eurodeputeti belg Guy Verhofstadt, bashkëpresident i ekzekutivit në emër të Parlamentit Evropian.
Në takimin e djeshëm, Komiteti Ekzekutiv i Konferencës ra dakord për metodën e tij të punës, zhvilloi një diskutim të parë mbi rregullat për seancat plenare dhe vazhdoi përgatitjen e ngjarjes inauguruese që do të mbahej në Ditën e Evropës. (ANSA)
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.