E detyrueshme, asnjë pallat i ri pa kabinë interneti – Vendimi i Qeverisë: Do të vendoset në hyrje të godinave, për shpejtësi të paktën 30 Mbit/s

Çdo godinë e re banimi ose biznesi do të pajiset me pikën e aksesit për infrastrukturën e rrjeteve të komunikimeve elektronike me shpejtësi të lartë, e cila të jetë pjesë e kushteve për dhënien e lejes së ndërtimit, si dhe me certifikatën e përdorimit, sipas legjislacionit për planifikimin dhe zhvillimin e territorit. Përmes një vendimi të miratuar më 30 mars, Këshilli i Ministrave ka përcaktuar se instalimi i kabinetit të lidhjeve të telekomunikacionit është i detyrueshëm në të gjitha godinat, përfshirë, komplekset rezidenciale, përveç banesave individuale.

Rrjete me shpejtësi të lartë, sipas vendimi konsiderohen rrjetet e komunikimeve elektronike, të cilat kanë kapacitetin të ofrojnë akses në shërbime me brez të gjerë, me një shpejtësi, të paktën 30 Mbit/s.

Në godinat e reja shumëkatëshe dhe/ose shumëpërdorimshe me mbi 10 kate rekomandohet të ketë dhomë teknike të telekomunikacioneve, ku të terminohen të gjitha kabllot për rrjetet e infrastrukturës së komunikimeve elektronike për godinën.

Dhoma teknike duhet të përmbushë kërkesat minimale të mëposhtme: lartësi minimale prej 2.2 m; duhet të ketë të shkruar Telekomunikacion” te dera; të ketë sistem ventilimi; instalime në një lartësi të rekomanduar, për të siguruar se dhoma është mbi nivelin e ujit në tokë; deri dhe dysheme të mbuluar me material antistatic dhe të parrëshqitshëm.

Ndërkaq, Infrastruktura e brendshme fizike për rrjetet e komunikimit elektronik bëhet pjesë e projektit të ndërtimeve të reja apo rikonstruksioneve dhe duhet të parashikojë shtrimin e tri linjave të ndara: fiber optike, kabllo bakri dhe kabllo koaksial në tuba të veçantë nga pika e aksesit të godinës/kuadri i shpërndarjes deri në çdo përdorues fundor: banesë apo njësi biznesi në godinë. Në çdo njësi banimi apo biznesi duhet të instalohet kaseta shpërndarëse e komunikimeve elektronike që mundëson marrjen e shërbimeve të shpejtësisë së lartë me të tria teknologjitë.

Rregullat e parashikuara nga pikat 3-15 do të aplikohen gradualisht për ndërtesat ekzistuese, kur ato janë objekt i punimeve të rikonstruksionit, rindërtimit apo punimeve rinovuese të mëdha për godinën, përcakton më tej Vendimi I Qeverisë. Në këto raste, kabina e transmetimeve elektronike mund të instalohet dhe jashtë godinës.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.