EBA për kreditë e këqija: Duhet një kompani publike për menaxhimin e aktiveve
Kreu i rregullatorit bankar i Europës thotë se duhet themeluar në mënyrë urgjente një institucion që trajton borxhin e keq, apo “bad bank”.
Gjermania e kundërshtoi muajin e kaluar një propozim për të trajtuar borxhin e keq. Norma e kredive me probleme ndaj totalit në bankat europiane është 3 herë më e lartë se në rajonet e tjera të mëdha, tha kreu i Autoritetit Bankar Europiane (EBA), Andrea Enria për Handelsblatt. Sipas tij, ulja e normës përbën lajm të mirë, por kjo po vjen në një mënyrë shumë të ngadaltë dh se ka nevojë për ndërhyrje.
Autoriteti Bankar Europian bëri të ditur muajin e kaluar se Bashkimi Europian duhet të themelojë një kompani të menaxhimit të aktiveve të financuar në mënyrë publike, që të trajtojë disa prej triliona eurove kredi të këqija që janë bërë kufizues të ekonomisë.
Megjithatë, zyrtarët në Gjermani thonë se ekonomia më e madhe e bllokut nuk sheh ndonjë përfitim nga kjo. Gjermania ka kundërshtuar prej kohësh planet për të ndarë rreziqet bankare, prej shqetësimeve se taksapaguesit gjermanë do të paguanin për shpëtimet në vendet e tjera.
Kreu i agjencisë rregullatore tha se nën këtë plan, secili vend do të jetë ende i përgjegjshëm për kreditë që do të hiqen nga bilanci. Sipas tij, e gjithë struktura është projektuar për të shmangur ndonjë formë të shpërndarjes së rrezikut apo të humbjeve. “Çdo ndihmë shtetërore do të adresohet ekskluzivisht në nivelin kombëtar”, tha ai.
Klevis Llaha/RTVSCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.