Ecuria e kredisë për biznesin – T1, në rritje ndërtimi dhe industria, tkurret bujqësia me tregtinë dhe shërbimet

Banka e Shqipërisë në raportin e tendencës në kreditim për tremujorin e parë të vitit thekson se “Kredia për sektorin privat ka shfaqur përmirësim të ritmit të rritjes, e mbështetur  si  nga  kredia  për  biznese,  ashtu  edhe  ajo  për  individë.  Zgjerimi  me  bazë  të  gjerë  i  kreditimit  tregon  për  një  rimëkëmbje  të  qëndrueshme  të  kërkesës  për  kredi  nga  sektori  privat,  si  dhe  një  përqasje më aktive të bankave në adresimin e kësaj kërkese”.

“Përmirësimi i kredisë për biznese vijon të mbështet nga kredia për investime,  por  ndryshe  nga  tremujori  paraardhës,  ky  përmirësim  ka  qenë  më  së  shumti  në  lekë.  Po  kështu,  kredia  për  biznesin  e  madh  ka  përcaktuar  përmirësimin  e  normave  të  rritjes  së  portofolit.  Sipas  sektorëve të ekonomisë vihet re se kreditë për ndërtimin dhe industrinë kanë  dhënë  kontributin  kryesor  në  këtë  përmirësim,  duke  balancuar  edhe ngadalësimin e sektorëve të tjerë”-nënvizon Banka e Shqipërisë mes rreshtave në raport.

“Financimi  i  bizneseve  sipas  sektorëve  të  ekonomisë  tregon  se  rritja  e  portofolit për tremujorin e parë ka qenë e përqendruar tek sektori i industrisë dhe ai i ndërtimit. Normat e rritjes vjetore të kredisë për këta dy sektorë kanë shënuar  përmirësim,  përkatësisht  në  10.0%  dhe  14.0%.  Gjithashtu,  rritja  e  ndjeshme tremujore e këtyre dy portofoleve ka kompensuar tkurrjen e kredisë për sektorin e bujqësisë dhe atë të tregtisë dhe shërbimeve. Krahasuar  me  një  vit  më  parë,  normat  e rritjes së kredisë për dy sektorët e fundit janë ngadalësuar në përkatësisht 6.0% dhe 7.0%. Ndërkohë, kredia për sektorin e bujqësisë u tkurr për herë të parë në dy vitet e fundit. Këto zhvillime janë reflektuar në rritjen e peshës së sektorit të industrisë dhe të ndërtimit në totalin e kredisë, në 26.0% dhe 14.5% përkatësisht.  Ndërkohë,  vihet  re  tkurrje  e  peshës  së  kredisë  për  sektorin  e  tregtisë, shërbimeve dhe bujqësisë, respektivisht në 43.9%, 14.4% dhe 1.2%, të kredisë totale për biznese”-nënvizon institucioni.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.