Ecuria e vaksinimit për COVID-19 – Ditët e hapura nuk përmirësojnë renditjen, Shqipëria nën mesataren e Europës për 100 banorë
Deri në datën 16 gusht janë realizuar 1 330 754 doza të vaksinës për COVID-19, ndërkohë që 572 816 qytetarë qytetarë apo rreth 43% e tyre i kanë marrë të dyja dozat e vaksinës. Të dhënat bëhen publike nga Ministria e Shëndetësisë dhe Mbrojtjes Sociale, duke theksuar se muaji gusht është i hapur për vaksinimin masiv për të gjitha grupmoshat +18 vjeç. Por, pavarësisht se autoritetet shqiptare i bëjnë apel çdo ditë qytetarëve t’i drejtohen qendrave të vaksinimit, vendi ynë renditet nën mesataren europiane për doza të administruara për 100 mijë banorë.
Sipas të dhënave të Our World in Data, të përditësuara në datën 16 gusht, Shqipëria rezulton se ka kryer 45.91 doza për 100 banorë, ndërkohë që mesatarja e vendeve të Evropës regjistrohet në 93.79 doza për 100 banorë. Sa i takon vendeve të Bashkimit Evropian, mesatarja rezulton të jetë 113.36 doza për 100 banorë, ndërsa sa i takon renditjes në vendet e rajonit, Shqipëria lihet pas nga Serbia, Mali i Zi dhe Maqedonia e Veriut. Vetëm Kosova dhe Bosnje Hercegovina kanë realizuar më pak vaksinime se Shqipëria.
Në vendin tonë po aplikohen disa vaksina, ndërkohë që sipas Ministrisë së Shëndetësisië çdo qytetar mund ta kryejë vaksinën kudo në qendrat shëndetësore apo në pikat e vaksinimit të përqendruar, duke u paraqitur me kartën e identitetit. Gjithashtu, për ata që nuk kanë mundësi për shkak të gjendjes shëndetësore, njësitë e lëvizshme të vaksinimit do të jenë kudo në territor për t’iu dhënë mundësinë e kryerjes së vaksinimit ndaj COVID-19 pa asnjë kufizim.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.