Ecuria e vaksinimit për COVID-19 – MSH: Janë kryer 638,338 doza. Shqipëria nën mesataren e Europës për 100 banorë

Deri në datën 14 maj janë realizuar 638 338 doza të vaksinës për COVID-19, ndërkohë që 192 936 qytetarë apo rreth 30% e tyre i kanë marrë të dyja dozat e vaksinës. Të dhënat bëhen publike nga Ministria e Shëndetësisë dhe Mbrojtjes Sociale, duke theksuar se vaksinimi po kryhet me një kalendar të kombinuar për personat mbi 60 vjeç dhe punonjës të shërbimeve kritike. Por, pavarësisht se vaksinimi për COVID-19 po vazhdon, vendi ynë renditet nën mesataren europiane për doza të administruara për 100 mijë banorë.

Sipas të dhënave të Our World in Data, të përditësuara në datën 12 Maj, Shqipëria rezulton se ka kryer 22.74 doza për 100 banorë, ndërkohë që mesatarja e vendeve të Evropës regjistrohet në 36.08 doza për 100 banorë. Sa i takon vendeve të Bashkimit Evropian, mesatarja rezulton të jetë 40.91 doza për 100 banorë, teksa në vendin e parë renditet Malta me 88.99 doza të administruara për 100 banorë 36.08.

Ndërkaq, sa i takon renditjes në vendet e rajonit, Shqipëria lihet pas nga Serbia që ka administruar 56.23 doza për 100 banorë, ndërkohë që Mali i Zi, Kosova dhe Maqedonia e Veriut ka realizuar më pak vaksinime se Shqipëria. Në vendin tonë po aplikohen disa vaksina, duke përfshirë Pfizer, AstraZeneca, Sputnik V dhe Coronavac. Dozat e kësaj të fundit përbëjnë dhe numrin më të lartë të dozave të mbërritura në vendin tonë.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.