Edhe Administrata në vetting! Zbardhet plani i ri i qeverisë
Denoncimet e shumta në portalin e kryeministrit Edi Rama për abuzimet me detyrën nga punonjësit e administratës publike kanë filluar të japin efekt.
Burime pranë Ministrisë së Financave bënë të ditur se katër drejtorët e Hetimit Tatimor Kombëtar kanë dhënë dorëheqjen pranë institucionit të kryeministrit, raporton gazeta “Panorama”.
Edhe pse janë në varësi të Ministrisë së Financave, mësohet se drejtori dhe Zv.drejtoresha e Përgjithshme e Hetimit Tatimor Kombëtar, po ashtu edhe drejtorët e hetimit tatimor të degëve të Veriut, të Jugut dhe drejtorisë qendrore, kanë paraqitur dorëheqjen vullnetarisht.
Vettingu
Qeveria ndërkohë do të ndërmarrë edhe një aksion të ri për të hetuar punën e tatim- taksave, hipotekave, doganave dhe institucionet e tjera të dhënies së shërbimeve.
Burime bënë të ditur për Gazetën “Panorama” se skuadra që po punon për qeverinë e re po harton një platformë vettingu për të gjithë punonjësit e shërbimeve ndaj publikut, duke filluar nga hipotekat, ku ky lloj vettingu i posaçëm do të aplikohet për herë të parë.
Mësohet se po ashtu se të gjithë punonjësit e hipotekave, hetimit tatimor e të tjerë do të rekrutohen apo rikonfimrohen me një proces konkursi të posaçëm.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.