Edhe Mali i Zi hap kufijtë me Shqipërinë – Vendimi hyn në fuqi nga 1 qershori, edhe plazhet të lejuara

Pas datës 1 qershor, shqiptarët mund të udhëtojnë drejt Malit të Zi, e madje edhe të frekuentojnë plazhet e vendit fqinj. Paradoksalisht, këtë nuk mund ta bëjnë deri më 10 qershor, sipas asaj që ka deklaruar kryeministri Rama. Shqipëria është i vetmi vend i Ballkanit Perëndimor me të cilin Mali i Zi hap kështu kufijtë.

Po më datë 1 Qershor edhe Shqipëria do të hap kufijtë e saj tokësor, por pa listë shtetesh, ndryshe nga Mali i Zi, apo edhe Greqia. Mali i Zi ndërkohë, siç deklaroi vetë kryeministri i vendit, do të hap kufijtë veç Shqipërisë edhe me Kroacinë, Slloveninë, Austrinë, Gjermaninë, Poloninë, Çekinë, Hungarinë dhe Greqinë. Vendi fqinj ka hapur plazhet për publikun që më 15 maj, bashkë me restorantet, baret e shumë shërbime të tjera, ndërkohe që prej ditës së Hënë ka deklaruar se nuk ka ende asnjë rast zyrtar me Covid-19.

Edhe shumë vende të tjera europiane kanë hequr së fundmi kufizimet për plazhet apo edhe për pishinat, si Italia së fundmi. Hapja e kufijve mes vendeve fqinje, sidomos me Greqine dhe Malin e Zi, kombinuar me kufizime në plazhet shqiptare, ku përveç shtyrjes në kohë të hapjes së tyre, përfshijnë edhe mungesën e plazheve private dhe një protokoll mjaft strikt të masave shëndetësore, rrezikon që të minojë tërësisht sezonin veror të këtij viti, i cili do të duhet të mbështetet te turizmi vendas. Kujtojmë se turizmi mban thuajse ¼ e ekonomisë shqiptare.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.