Edlira Çepani, në ‘Argument’: ”Kemi qasje të dobët ndaj shërbimeve që ofrojmë,në lidhje me shërbimin mjekësor por dhe atë arsimor

Sociologia, Edlira Çepani ishte pjesë e panelit në ‘Argument’ të enjten në mbrëmje, ku u diskutua rreth shifrave të publikuara, së fundmi nga INSTAT rreth uljes së lindshmërisë. Sipas, sociologes Çepani, ky problem ndodh për shkak të pasigurisë së jetës në sensin ekonomik, pasi jeta vazhdon të bëhet cdo ditë e më e shtrenjtë dhe këto faktorë  e detyrojnë familjen të tkurret.

‘’Duhet të theksojmë se, kemi qasje të dobët ndaj shërbimeve që ofrojmë, në lidhje me shërbimin mjekësor por dhe atë arsimor, pasi asnjëri prej tyre nuk është në nivelin e duhur. Një tjetër faktor shumë i rëndësishëm është dhe mungesa e shpresës. Shohim që gjithnjë e më shumë, po ulet përqindja e atyre që duan të kthehen në Shqipëri. Shqetësues është fakti  që ata individë që po largohen, nuk janë ata të shtresës më të varfër, por janë ata të shtresës së mesme, të cilët janë praktikisht truri i vendit. Nëse nuk do kemi politika për qarkullimin e trurit situata do jetë akoma dhe më e përkeqësuar.’’

Sipas sociologes, një nga arsyet kryesore për të cilat këta të rinjtë nuk kthehen është tregu i punës, por ajo që vlen për tu përmendur është arsyeja se përse kthehen. Dhe arsyeja se përse kthehen lidhet me lidhjen e ngushtë që këta të rinj kanë me familjen por dhe vendin e tyre, prandaj duhet të fokusohemi më tepër tek përforcimi i promovimit të vlerave të familjes.

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.