Edukimi digjital – Projekti i shtrirë në 66 shkolla, nis trajnimi i 470 mësuesve të TIK
Një platformë digjitale dhe në shqip do të vijë për herë të parë në ndihmë të mësuesve të TIK dhe të nxënësve. Në kuadër të Zhvillimit Profesional këtë vit do të trajnohen rreth 470 mësues të TIK , të cilët më pas do të ndajnë njohurit e tyre me nxënësit. Ministrja e Arsimit dhe e Sportit Lindita Nikolla, referuar domosdoshmërisë për të përgatitur njerëz të kualifikuar për tregun e punës, u shpreh se lëndët e integruara do të fillojnë që në klasë të katërt. Ndërkohë që në klasën e tetë do të futet koncepti i kodimit.
“Në këtë këndvështrim edhe kompetenca që lidhet me teknologjinë e informacionit ka bërë të mundur që të futet në pjesë të kurrikulës që në klasën e katërt, ndryshe nga ç’ishte më parë dhe fillonte në klasat e mëvonshme të formimit në arsimin parauniversitar, pra fillonte në klasën e 7-të. Me kurrikulën e re ajo fillon në klasën e katërt dhe sigurisht nga risitë ndër të cilat edhe ne jemi mbledhur sot këtu është futja e për herë të parë e konceptit të kodimit në klasën e 8-të”, tha Nikolla
Sipas drejtoreshës së arsimit parauniversitar Zamira Gjini së shpejti do të fillojë edhe trajnimi i mësuesve të tjerë, si ata të matematikës dhe të fizikës.
“Ministria e Arsimit, Sportit dhe Rinisë ka në fokus të veçantë një nga prioritetet e saj edukimin dixhital. Nëpërmjet programeve dixhitale ka një kurrikul të detajuar në të gjitha shkollat e Shqipërisë duke mundësuar një trajnim më të madh të mësuesve të TIK-ut.”
Aktualisht portal do të jetë i aksesueshëm për 66 gjimnaze digjitale si dhe për mësuesit e tyre. Në këtë portal ka video tutoriale për nxënësit dhe mësuesit, si dhe ka teste interaktive që nxënësit të testojnë njohuritë e tyre.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.