Edukimi në vazhdim në shëndetësi – Urdhrat profesionalë: Fondi i dedikuar nga QSH, të shkojë në 3%
Urdhrat profesionalë të bluzave të bardha do të kërkojnë rritjen e buxhetit të dedikuar për edukimin në vazhdim nga qendrat shëndetësore. Propozimi i Urdhrit të Mjekut, Farmacistit dhe Stomatologut pritet të jetë në masën 3% të buxhetit të këtyre institucioneve, nga 1% që është aktualisht.
Shkak i kërkesës për këtë ndryshim është bërë masa e ulët dhe e pamjaftueshme për të garantuar edukim në vazhdim cilësor dhe efikas për bluzat e bardha, si një investim në cilësinë e kujdesit shëndetësor.
Sipas tyre, nevoja për fonde në këtë drejtim është edhe më e lartë, por duke marrë në konsideratë kushtet financiare, kërkesa do të përqendrohet në rritjen me 2% të fondit aktual.
Ndërkohë që, sipas Qendrës Kombëtare të Edukimit në Vazhdim problem është edhe përdorimi i fondit prej 1%, pasi sipas saj shumë qendra shëndetësore nuk e zbatojnë këtë detyrim.
Nga ana tjetër, ky dikaster ka kërkuar rishikimin të kontratave të spitaleve me Fondin e Sigurimit të Detyrueshëm të Kujdesit Shëndetësor, duke përcaktuar përdorimin e një fondi të dedikuar për edukimin në vazhdim.
Aktualisht spitalet nuk kanë një fond të dedikuar për këtë program, ndërkohë që sipas QKEV-së, angazhimi i pamjaftueshëm i institucioneve publike të kujdesit shëndetësor në ofrimin e aktiviteteve të edukimit në vazhdim, është një shqetësim i rëndësishëm për mbarëvajtjen e këtij sistemi.
Sipas ligjit “Për Kujdesin Shëndetësor” institucionet shëndetësore kanë detyrimin për të ofruar aktivitete të edukimit në vazhdim për punonjësit e vet në mënyrë që ata të përmbushin minimalisht 30% të numrit të krediteve të kërkuara.
Ndërkohë, edhe në vitin 2016 ofrues kryesorë të aktiviteteve për bluzat e bardha ishin shoqatat e profesionistëve dhe organizatat e tjera jopublike.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.