Efektet e sanksioneve të Trump – Një nga industritë ikonike të Iranit në prag të ‘katastrofës’

Një nga industritë më të famshme të eksportit në Iran po paralajmëron një ‘katastrofë’ kur sanksionet amerikane të fillojnë të zbatohen në vend muajin e ardhshëm. Bëhet fjalë për industrinë e qilimave, e cila punëson qindra mijëra njerëz dhe fiton qindra miliona dollarë nga eksportet.

Vendimi i Presidentit amerikan, Donald Trump, për të lënë marrëveshjen bërthamore të Iranit dhe për të rivendosur sanksionet pritet të ‘vrasë’ tregun e qilimave. Pasojat pritet të ndjehen në të gjithë ekonominë iraniane dhe më gjerë.

Pas heqjes së sanksioneve ndaj Iranit nga Administrata e Obamës në vitin 2016, eksportet e qilimave u rritën ndjeshëm. Sipas Qendrës Kombëtare të Qilimave të Iranit, gjatë periudhës mars 2017 – janar 2018 qilimat që u shitën për eksport kapën vlerën 336 milionë dollarë, me Shtetet e Bashkuara destinacionin kryesor.

Por, Reza Zollanvari, familja e të cilit ka bërë qilima për gjashtë breza, ka një ide të mirë për atë që pritet të ndodhë kur sanksionet të vendosen më 6 gusht, nisur nga ajo që ka parë më parë në këtë drejtim.

Për t’u mbijetuar sanksioneve të vendosura nga Kombet e Bashkuara ndaj Iranit tetë vjet më parë, Zollanvari vendosi të bënte qilima mëndafshi në Indi, duke krijuar një bazë atje në vitin 2012, një strategji të cilën po planifikon ta ndjekë sërish pas vendosjes së sansksioneve.

Por, më pas filloi të eksportonte përsëri në SHBA në janar të vitit 2016 me heqjen e sanksioneve, periudhë në të cilën u bë edhe nënshkrimi i marrëveshjes ndërkombëtare bërthamore. Biznesi në Shtetet e Bashkuara u kthye fuqishëm dhe përgjatë periudhës janari 2016 dhe qershor 2018, Zollanvari sërish krijoi 20% të shitjeve të saj në Shtetet e Bashkuara. Por, mesa duket, me vendosjen e sanksioneve të reja, kjo industri është gati të ‘zhduket’ edhe një herë.

G.D/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.