Efekti i Covid-19 në tregun bankar shqiptar – Raporti i “BEI”: Kredia do preket negativisht, por tregu ka një pozicion të kënaqshëm
Banka Europiane e Investimeve (EIB) ka publikuar raportin më të fundit periodik për sektorin bankar në vendet e Europës qendrore dhe juglindore, ku në analizë merret edhe Shqipëria. Raporti i ri reflekton edhe situatën e krijuar nga Covid-19. “Kërkesa për hua në Shqipëri rezulton nën pritshmëritë, duke rënë gjatë 6 muajve të kaluara, dhe duke rënë në territor neutral pas 2 vitesh me trendin në rritje”-thotë banka që ndër të tjera shton se; “ndërkohë që impakti i plotë i pandemisë mbetet ende i pasigurtë, huatë për familjet mund të preken negativisht nga rënia e konsumit, por se nga ana tjetër pritet një hua më e lartë për likuditet emergjent, rrjedhojë e nevojës së kompanive pas karantinës, duke u mbështetur edhe nga paketat e qeverisë”.
Fondi sovran i garancisë është mjeti i qeverisë i vendosur në dispozicion të biznesit dhe të bankave. Raporti i cili përpilohet në formë ankete tregon jo vetëm një rritje të kërkesës për hua në valutë të huaj, por edhe se pritshmëritë për të ardhmen janë të njëjta; kredia në valutë do të ketë epërsi ndaj asaj në monedhën vendase.
Pavarësisht situatës së krijuar nag covid-19. Anketa tregon se pjesa dërrmuese e bankave mëmë të cilat kanë njësi që operojnë në tregun financiar huadhënës shqiptar mendojnë se pozicioni i këtij tregu në vendin tonë është i kënaqshëm ose optimal si dhe me një potencial mesatar. Vetëm një e treta e bankave mëmë e vlerësojnë potencialin e këtij tregu në vendin tonë si të ulët.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.