Ekonomia e Eurozonës gjatë karantinës. T2 rishikohet në rritje pavarësisht se ishte rënia më e madhe në histori
Ekonomia e Eurozonës ra me pak se ç’pritej në tremujorin e dytë, megjithatë rënia ishte më e madhja në historik, ndërkohë që shpenzimet konsumatore u tërhoqën prej pandemisë. Produkti i Brendshëm Bruto ra me 11.8% nga tremujori i kaluar dhe me 14.7% me bazë vjetore, sipas të dhënave të Eurostat. Projeksionet tregonin për një rënie me 12.1% dhe 15% në mënyrë respektive.
Tkurrja në periudhën Prill-Qershor, gjatë së cilës kufizimet ishin në të gjithë kontinentin, ishte më e madhja që kur nisi regjistrimi i të dhënave në vitin 1995. Në tremujorin e parë të vitit Produkti i Brendshëm Bruto u tkurr me 3.7% dhe 3.2% me bazë vjetore. Rëniet më të theksuara në tremujorin e dytë ishin në Spanjë, Greqi, Portugali dhe Francë.
Shpenzimet e familjeve kishin influencën më të madhe negative, duke i hequr 6.6% rritjes ekonomike, ndjekur nga formimi bruto i kapitalit fiks, në minus 3.8%. Tregtia neto, shpenzimet qeveritare dhe ndryshimet në inventarë patën gjithashtu ndikim negativ.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.