Ekonomia e Japonisë rritet me 2.2%, nxitur nga kërkesa brenda dhe jashtë vendit

Ekonomia e Japonisë u rrit me normë më të shpejtë në 1 vit për tremujorin e parë, duke shënuar periudhën më të gjatë të ekspansionit në 1 dekadë, nxitur nga eksportet e forta dhe një rritje e konsumit privat.

Të dhënat ofrojnë lehtësim për politikëbërësit e Bankës së Japonisë, të cilët shpresojnë se fuqizimi i ekonomisë do të nxisë inflacionin që qëndron prej kohësh poshtë objektivit prej 2%.

Ekonomia e tretë më e madhe në Botë u rrit me një normë vjetore prej 2.2% në tremujorin e parë, sipër projeksioneve prej 1.7% nga analistët. Kjo shënoi rritjen e 4 radhazi për tremujor, periudha më e gjatë që prej 2006-ës, kur Banka e Japonisë po përfundonte programin e kaluar të lehtësimit sasior.

Analistët thonë se rritja është e qëndrueshme, e nxitur nga kërkesa brenda dhe jashtë vendit. Ekonomia e Japonisë e tejkaloi rritjen e Eurozonës me 1.8% dhe Shteteve të Bashkuara me 0.7% për tremujorin e parë.

Ekonomia ka treguar shenja përmirësimi me eksportet dhe prodhimin e fabrikave, të nxitur nga një fuqizim i kërkesës jashtë vendit. Megjithatë, çmimet e konsumit nuk po tregojnë rritjen e duhur ndërkohë që firmat po hezitojnë të rrisin pagat.

Kjo e mban Bankën e Japonisë nën presion për të vazhduar me stimujt monetar pavarësisht fuqizimit të ekonomisë.

Konsumi privat, që përbën për 60% të Produktit të Brendshëm Bruto, u rrit me 0.4% në tremujorin e parë, prej kërkesës së fortë për smartphona dhe veshje. Kërkesa e jashtme i shtoi 0.1%

Produktit të Brendshëm bruto, ndërkohë që eksportet u zgjeruan me 2.1% prej dërgesave në Europë dhe Azi. Shpenzimet kapitale (CAPEX) u rritën me 0.2% në tremujorin e parë, duke thyer projeksionet për një rënie me 0.4%.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.