Ekonomia më e madhe në botë – Rritet me 3% në T3, inventarët dhe tregtia “mbrojnë” dëmet e uraganëve
Ekonomia e Shteteve të Bashkuara ka ruajtur vrullin në tremujorin e tretë, mbështetur nga rritja e investimeve në inventarë dhe tkurrja e deficitit tregtar, që kanë kompensuar për rënien e shpenzimeve konsumatore dhe të aktivitetit të ndërtimit, që erdhën prej uraganëve.
Produkti i Brendshëm Bruto u rrit me 3% me bazë vjetore në tremujorin e tretë, mbështetur gjithashtu nga shpenzimet e mëdha të bizneseve në pajisje e makineri.
Duke përjashtuar investimet në inventarë, ekonomia u rrit me 2.3%, duke u ngadalësuar nga tremujori i dytë.
Analistët thonë se ishte një rezultat pozitiv, duke marrë parasysh ndikimin e uraganëve në atë periudhë.
Ekonomia rezultoi në një normë rritjeje prej 3.1% në tremujorin e dytë, që ishte hera e parë që prej 2014-ës që ndodhte një rritje sipër 3%-shit për dy tremujorë radhazi.
Qeveria deklaroi se ndërsa ishte e pamundur për të vlerësuar ndikimin total të uraganëve Harvey dhe Irma në Produktin e Brendshëm Bruto të tremujorit të tretë, vlerësimet paraprake tregojnë se stuhitë kanë shkaktuar një humbje prej 121 miliardë dollarë në aktivet materiale të zotëruara nga individët dhe 10.4 miliardë dollarë nga aktivet materiale të zotëruara nga Qeveria.
Uragani Maria, që shkatërroi infrastrukturën e Porto Rico dhe ishujve Virgin, nuk pati ndikim në këtë tregues, pasi nuk janë të përfshra në llogaritë kombëtare të Shteteve të Bashkuara.
Dollari amerikan pati rritje të madhe në sesionin e fundit të javës që kaloi, duke marrë mbështetje nga të dhënat.
Ekonomia, pas krizës finanicare, ka treguar vitin e 8 radhazi të rritjes, me pak shenja të dobësimit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.