Ekonomia franceze, në vrull – Banka Qendrore projekton rritjen më të fortë vjetore që prej 2011
Banka e Francës projekton një rritje me 0.5% të ekonomisë së vendit në tremujorin e katërt, duke mbajtur ritmin e qëndrueshëm të rritjes të tremujorit të kaluar. Ekonomia franceze pritet të tregojë rritjen më të madhe të Produktit të Brendshëm Bruto që prej vitit 2011, në një kohë që Presidenti i zgjedhur këtë vit Emmanuel Macron, po përpiqet të përshpejtojë reformat në vend.
Agjencia e Statistikave në Francë INSEE ka projektuar një rritje prej 1.8% këtë vit, sipër vlerësimit të Qeverisë prej 1.7%. Në raportin e fundit mbi klimën e biznesit, Banka e Francës bëri të ditur se humori në sektorin industrial qëndron në nivelin më të lartë që prej vitit 2011.
Treguesi i ndjesisë në industrinë e shërbimeve qëndron gjithashtu në nivelin më të lartë në 6 vite, ndërsa treguesi për sektorin e ndërtimit, preku nivelin më të lartë që prej Dhjetorit 2007.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.