Ekonomia franceze po ngadalësohet në tremujorin e parë, Banka Qendrore pesimiste

Ekonomia franceze do të zgjerohet me 0.3% gjatë tremujorit të parë të këtij viti, nënvizon Banka Qendrore e vendit në projeksionet e para zyrtare të publikuara për këtë periudhë kohore.

Këto projeksione flasin për një ngadalësim të rritjes, pasi në tremujorin paraardhës, atë të fundit të vitit 2016, rritja ekonomike fiksohej pranë 0.4%.

Ndër të tjera, Banka Qendrore e Francës, shtoi se, indikatori që mat ndjeshmërinë e ambientit të biznesit, sidomos për industrinë, ra në Janar në krahasim me Dhjetorin e një viti më parë.

Por, ndër të tjera, banka nënvizoi se, pret që prodhimi të rritet gjatë Shkurtit. Indikatori që mat klimën e biznesit në sektorin e shërbimeve u rrit gjatë Janarit, duke prekur nivelin më të lartë që prej muajit Qershor të vitit 2011.

Sektori i shërbimeve është lokomotiva e ekonomisë së dytë më të madhe në Eurozonë. Aktiviteti në sektorin e ndërtimit nga ana tjetër, projektohet në nivele të pandryshuara, çka sinjalizon se, sektori nuk do të kontribuojë në rritjen ekonomike të vendit.

Gjatë vitit të kaluar, qeveria franceze, kryesisht për arsye elektorale, dështoi të arrijë objektivat e rritjes, me 0.3 pikë përqindje.

Roel Korkuti/RTV SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.