Ekonomia gjermane, drejt rimëkëmbjes – Pritet rritje më e fortë në tremujorin e tretë e nxitur nga kërkesa e brendshme
Ekonomia gjermane ndodhet në rrugëtim për një rimëkëmbje të gjatë dhe më të fortë në tremujorin e tretë, nxitur nga kërkesa e brendshme, pasi Produkti i Brendshëm Bruto u rrit me 1.5% në tremujorin e dytë, sipas ministrisë së Financave. Vala e tretë e infeksioneve me koronavirus dhe karantina më e gjatë se sa pritej, bënë që ekonomia më e madhe e Europës të tkurrej me 2.1% në tremujorin e parë të vitit, nga fundi i 2020-s. Ministria e Financave theksoi në raport se sondazhet e ndjesisë ekonomike dhe treguesit e të ardhmes, sugjerojnë për një vazhdim të optimizmit tek bizneset dhe për një aktivitet të lartë të ekonomisë në muajt e Verës.
Rihapja e ekonomisë dhe rënia e rasteve me Covid në nisje të Verës kanë rritur shpenzimet e familjeve, çfarë solli një fuqizim të shitjeve me pakicë në Maj dhe Qershor. Rimëkëmbja ekonomike ka rritur gjithashtu të ardhurat tatimore, pavarësisht se të ardhurat e akumuluara nga taksat nga Janari në Korrik, janë ende 1.7% më pak krahasuar me të njëjtën periudhë në vitin përpara pandemisë 2019, sipas ministrisë.
Kjo tregon hendekun që ka lënë pandemia tek financat publike. Ministri i Financave, Olaf Scholz mori dritën e gjelbër në parlament për të pezulluar limitet e borxhit në kushtetutë, që të lejojë huamarrje të re rekord prej rreth 240 miliardë euro këtë vit dhe mbi 130 miliardë euro në vitin e ardhshëm. Scholz, kandidati demokrat i qendrës së majtë për të zëvendësuar konservatoren Angela Merkel në zgjedhjet e Shtatorit, ka propozuar ndalimin e frenave të borxhit për vitin e tretë radhazi, për të lejuar huamarrje shtesë çdo vit.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.