Ekonomia ka “më pak lekë” – Treguesi i parasë së gjerë, në rënie me 0.5%

Oferta e parasë në ekonomi ka shënuar ecuri të dobët gjatë vitit 2018. Norma ndryshimi vjetor i parasë së gjerë, përfaqësuar nga agregati monetar M3, rezultoi në rënie edhe për muajin nëntor.

Sipas Bankës së Shqipërisë, paraja e gjerë pësoi një rënie vjetore prej 0.5% në muajin nëntor, të ngjashëm me mesataren e periudhës janar-tetor. Ecuria e këtij treguesi reflekton edhe efektin statistikor të mbiçmimit të monedhës vendase ndaj euros në kursin e këmbimit valutor.

Duke qenë se paraja e gjerë përfshin edhe depozitat bankare në euro, zhvlerësimi i monedhës europiane ndikon në rënien e agregatit monetar M3.

Megjithatë, sipas Bankës së Shqipërisë, kjo lidhet edhe me ndryshimet strukturore të mbajtjes së parasë, më konkretisht një zhvendosja e depozitave në maturitete më të gjata se dy vjet.

E pastruar nga efekti i këtyre dy faktorëve, treguesi i parasë së gjerë do të kishte gjithsesi një rritje modeste me rreth 2%.

Në analizën e Bankës së Shqipërisë, krijimi i ulët i parasë në ekonomi tregon edhe financimin ende të dobët të sektorit privat me mjete monetare nga sektori bankar.

Edhe treguesi i parasë në lekë, (agregati M2), në muajin nëntor shënoi normë rënëse me 0.4%, e njëjtë me mesataren e periudhës janar-tetor.

Ndërkohë, agregati M1, që përbëhet prej parasë jashtë bankave dhe depozitave bankare pa afat, është rritur mesatarisht me rreth 5.3% gjatë vitit 2018.

Kjo tregon se, në kushtet e normave minimale të interesit, familjet dhe bizneset preferojnë t’i mbajnë paratë në gjendje likuide.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.