Ekonomia kineze humbet vrull / Ngadalësohet në 7.9% në T2 prej aktivitetit industrial dhe vatrave të Covid
Ekonomia kineze është rritur më ngadaltë se sa pritej në tremujorin e dytë, ndikuar nga kostot e larta të lëndëve të para dhe vatrave të reja të Covid-19, duke rritur pritshmëritë për më shumë mbështetje ekonomike nga politikëbërësit.
Produkti i Brendshëm Bruto u rrit me 7.9% në periudhën Prill-Qershor me bazë vjetore, poshtë projeksioneve për një rritje me 8.1%. Kjo normë ishte shumë më e uëlt se 18.3% rritje në tremujorin e parë, pavarësisht se e fryrë nga rënia e madhe si pasojë e pandemisë në tremujorin e parë 2020. Shitjet me pakicë dhe prodhimi industrial u rrit me një normë më të ngadaltë në Qershor, ndikuar nga rënia e madhe e prodhimit të automjeteve. Megjithatë, të dhënat e aktivitetit për Qershorin i kanë thyer pritshmërinë, duke ofruar pak lehtësim për investitorët që shqetësohen për një ngadalësim më vonë gjatë vitit. Ndërkohë që ekonomia e dytë më e madhe në botë është rimëkëmbur fortë nga kriza e Covid-19, nxitur nga kërkesa e fortë për eksporte dhe stimujt ekonomikë, të dhënat e fundit sugjerojnë një humbje të vrullit. Kostot e larta të lëndëve të para, problemet me ofertën dhe masat e ndalimit të ndotjes po peshojnë tek aktiviteti industrial, ndërkohë që vatra të vogla të Covid-19 kanë penguar shpenzimet konsumatore. Investitorët po monitorojnë bankën qendrore, nëse do marrë një qasje më të zbutur të politikave, pasi lajmëroi javën e kaluar se do të shkurtojë sasinë e parasë cash që bankat mbajnë si rezerva.
Klevis Llaha – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.