Ekonomia ra me 10.23% në prill-qershor – Taksat hoqën 1.85% të PBB-së, konsumi ra me 7.57%
Efekti i pandemisë, në kulmin e saj, gjatë tremujorit të dytë të vitit, në ekonominë e vendit, vlerësohet në 10.23% të Prodhimit të Brendshëm Bruto. Instituti i Statistikave ka nxjerrë kështu bilancin e parë të përgjithshëm të ekonomisë në tre muajt prill-qershor. Gjatë kësaj periudhe, Prodhimi i Brendshëm Bruto i vendit vlerësohet të jetë tkurrur në masën 10.23%, krahasuar me të njëjtën periudhë të një viti më parë.
Sipas Instat, ndikimin negativ më të madh vlerësohet ta kenë dhënë aktivitetet: tregti, transport, akomodim dhe shërbim ushqimor, në masën 4.11 pikë përqindje, ndjekur nga industria, energjia dhe uji me 1.45 pikë përqindje, aktivitetet profesionale dhe shërbimet administratrive me 1.23 pikë përqindje, ndërtimi me 0.9 pikë përqindje, aktivitetet financiare me 0.43 pikë përqindje, argëtimi me 0.41 pikë përqindje, dhe komunikacioni me 0.24 pikë përqindje. Të vetmet aktivitete që kanë kontribuar pozitivisht në prodhimin e brendshëm bruto janë: bujqësia, pyjet dhe peshimi me 0.7 pikë, si dhe ai i pasurive të paluajtshme, me plus 0.29 pikë përqindje.
Ky aktivitet, pra ai i pasurive të paluajtshme, regjistrohet në rritje me mbi 5% krahasuar me të njëjtën periudhë të një viti më parë. Ndërkaq, kontribut të ndjeshëm negativ kanë dhënë edhe taksat neto mbi produktet, që i kanë hequr PBB-së 1.85 pikë përqindje gjatë tremujorit të dytë të vitit. Të dhënat tregojnë gjithashtu se, konsumi final i popullatës gjatë kësaj periudhe kohore ra me 7.57% në terma vjetorë, ndërkohë që krahasuar me tremujorin e parë të vitit, rënia fiksohet në masën 7.06%.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.