Ekonomia turke i rikthehet rritjes – Lë pas recesionin. Qeveria pret përshpejtim në vitin 2020!
Ekonomia turke i’u rikthye rritjes në tremujorin e tretë, me një normë prej 0.9% me bazë vjetore, duke lënë pas 3 tremujorë radhazi të tkurrjes që erdhën pas krizës së valutës së vitit të kaluar.
Turqia ka një historik të rritjes prej 5%, por rënia me 30% e lirës në vitin e kaluar rriti inflacionin dhe normat e interesit, ndërkohë që kërkesa e brendshme pësoi rënie.
Banka Qendrore ka ulur interesat që prej atëherë, për të nxitur aktivitetin ekonomik. Qeveria ka projektuar një normë të rritjes ekonomike prej 5% në vitin e ardhshëm dhe ministri i Financave, Berat Albayrak shkroi në Twitter se treguesit kryesorë për tremujorin e katërt sugjerojnë një rritje të vrullit.
Rritja ekonomike për tremujorin e tretë në Turqi u nxit nga sektori i bujqësisë, që pati rritje me 3.8%, ndërsa industria dhe shërbimet u rritën me 1.6% dhe 0.6% në mënyrë respektive. Megjithatë, sektori i ndërtimit, pësoi rënie me 7.8% sipas institutit turk të Statistikave.
Lira qëndroi në 5.7550 kundër dollarit pas publikimit të të dhënave. Instituti i Statistikave bëri të ditur se eksportet u rritën me 5.1% gjatë periudhës, ndërsa importet u rritën me 7.6%.
Ndërkohë që ekonomia po rimëkëmbet, inflacioni ra nga nivelet dyshifrorë në muajin Tetor dhe rritja e kredisë u përshpejtua falë uljes së interesave nga banka qendrore.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.