Ekonomia turke vazhdon tkurrjen – Me 2.6% në nisje të vitit. Konfirmohet recesioni
Ekonomia turke u tkurr me 2.6% në tremujorin e parë me bazë vjetore, duke konfirmuar recesionin që erdhi pas krizës së valutës. Ekonomia turke që ka një historik të rritjes prej mbi 5%, është tronditur nga rënia me 36% e lirës kundër dollarit që prej fundit të 2017-ës. Inflacioni u rrit vitin e kaluar dhe banka qendrore rriti disa herë normën bazë të interesit. Me bazë tremujore, Produkti i Brendshëm Bruto u rrit me 1.3% sipas institutit turk të Statistikave.
Të dhënat konfirmuan gjithashtu se ekonomia më e madhe e Lindjes së Mesme u tkurr me 3% në tremujorin e katërt, që është norma më e dobët në një dekadë. Rënia e aktivitetit të ndërtimit dhe sektorëve industrialë ka goditur ekonominë në tremujorin e parë, ndërkohë që bujqësia ka pasur rritje. Kriza e valutës në vitin e kaluar, që erdhi nga përplasjet diplomatike me Washingtonin dhe shqetësimeve mbi pavarësinë e bankës qendrore, ndaloi boom-in e ndërtimit që nxitej nga kapitali i huaj.
Lira ka pasur luhatje në muajt e fundit, ndërkohë që investitorët janë shqetësuar mbi kërcënimin e tarifave të reja nga SHBA, pasiguria mbi zgjedhjet lokale, rënia e rezervave të bankës qendrore dhe tendenca e turqëve për të shtuar zotërimet e huaja. Të dhëna për tremujorin e dytë kanë treguar pesimizëm në lidhje me perspektivën ekonomike. Indeksi i ndjesisë së konsumatorëve ra në nivelin më të ulët që prej vitit 2004, ndërsa sondazhet drejt bizneseve treguan një përkeqësim gjithashtu. Deficciti tregtar u tkurr me 55.6% në 2.9 miliardë dollarë, ndërkohë që importet ranë me 15.1%.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.