Ekskluzive/ Turqit futen në “lojë”! Çalik Holding bën ofertë për blerjen e Telekom Albania

Kompania “Telekom Albania” tashmë mund të ketë një ofertues të ri! Burime nga qeveria shqiptare por edhe nga anëtarësia e Dhomës së Tregtisë Shqipëri-Turqi kanë konfirmuar jo zyrtarisht për televizionin SCAN se gjiganti turk `Çalik Holding`,  ka prezantuar një ofertë për blerjen e “Telekom Albania”, që tashmë është nxjerrë zyrtarisht në shitje.

Burimet flasim për  ofertë mjaft konkurruese dhe deri më tani mund të jetë edhe kandidatja kryesore për të fituar marrëveshjen e blerjes së “Telekom Albania”, aktualisht nën menaxhimin e “Deutsche Telekom”.

Në rast se turqit e `Çalik Holding` do të shpalleshin fitues të kësaj gare, atëherë do të kishim një ridimensionin tërësor të tregut të telefonisë celulare në Shqipëri, pasi `Çalik Holding` aktualisht zotëron operatorin e tretë të telefonisë celulare në vendin tonë, Eagle Mobile.

Grupi është i pranishëm në tregun vendas edhe në tregun bankar, pasi zotëron bankën më të madhe private. Interesit të SCAN në lidhje me këtë çështje, “Çalik Holding” nuk ka preferuar t`i japë një përgjigje zyrtare.

Oferta e kompanisë turke, duket se për momentin lë në hije atë të Telekom Srbija, si dhe atë të Vivacom apo PPF.

Kompania serbe ende vijon të jetë në garë pavarësisht zërave për një refuzim nga qeveria shqiptare.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.