Ekskluzive/Konfirmohet B1 – Moody`s për Shqipërinë: zgjedhjet, drejtësia dhe kriza

Televizioni Scan ka siguruar raportin e fundit periodik të Agjencisë së vlerësimit të kreditit, Moody`s, për Shqipërinë, ku vlerësimi i borxhit sovran mbetet i pandryshuar, në B1 të qëndrueshëm.

Moody`s analizon faktorët e riskut dhe progreset e Shqipërisë në katër drejtime, që përbëjnë edhe shtyllat kryesore të vlerësimit: forcën ekonomike, atë institucionale, sektorin bankar dhe forcën fiskale. Të tre të parat vlerësohen të moderuara, përvec forcës fiskale, që vlerësohet e ulët.

Faktorët kyç që nxisin kreditimin e Shqipërisë në B1 janë: konsolidimi fiskal dhe progresi në mbledhjen e detyrimeve të prapambetura, reforma administrative dhe ajo në sistemin e drejtësisë në kuadër të përpjekjes për t’u anëtarësuar në Bashkimin Europian, stabiliteti i fortë i çmimeve si dhe investimet e huaja direkte thelbësore.

Sfidat kryesore janë: borxhi i lartë publik, paçka se në rënie; struktura e dobët e financimit të brendshëm, paçka se në përmirësim; fuqia e kufizuar institucionale, dhe në veçanti korrupsioni, si dhe stoku i lartë i kredive jo performuese.

Agjencia prestigjioze projekton një rritje ekonomike të Shqipërisë në 3.5% gjatë këtij viti dhe 3.6% vitin e ardhshëm.

“Ne presim që rimëkëmbja ekonomike e Shqipërisë të vazhdojë“-vijon më tej raporti.

“Ne presim që zhvillimet pozitive të rriten me afrimin e vendit drejt Bashkimit Europian, pasi kjo është vërtetuar të jetë një motor i investimeve të huaja direkte për vendet kandidate“, thuhet më tej.

“Vlerësimi jonë merr në konsideratë edhe përpjekjet e Shqipërisë për të adresuar problematikën e sundimit të ligjit, dhe kontrollit të korrupsionit“, thotë Moody`s që i referohet vlerësimit të Këshillit të Europës, ku përfshihet depolitizimi i administratës publike, forcimi i sistemit gjyqësor dhe përpjekjet për të luftuar korrupsionin dhe krimin e organizuar.

Sa i përket faktorëve që mund të sjellin një përmirësim nga niveli B1 i qëndrueshëm, Moody`s radhit progresin në konsolidimin fiskal, uljen e borxhit, luftën ndaj korrupsioni dhe eficencën gjyqësore,  pasi rrit konkurrueshmërinë dhe tërheq biznesin.

Nga ana tjetër, dështimi me stabilizimin e deficitit fiskal dhe borxhit publik, sektori energjetik dhe rënia e remitancave nga Greqia, janë faktorë që mund të sjellin zhvlerësim të Shqipërisë, nënvizon agjencia.

“Zgjedhjet parlamentare të qershorit, në rast se shoqërohen edhe me destabilitet politik, mund të sjellin një shtyrje të reformave“, thotë agjencia. Ngadalësim i reformës së axhendave do të krijojë probleme me uljen e borxhit, e për rrjedhojë mund të gjenerojë edhe një zhvlerësim të Shqipërisë.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.