Ekskluzive/“Moody`s” për Shqipërinë – Në 2017 dhe 2018 rritet ekonomia dhe PBB për frymë
Moody’s parashikon rritje më të madhe ekonomike për Shqipërinë në 2017. Agjencia prestigjioze e vlerësimit të kreditit ka publikuar së fundmi një raport për Shqipërinë.
SCAN ka siguruar ekskluzivisht këtë raport, ku agjencia duket bindshëm më optimiste sa i përket ecurisë së ekonomisë shqiptare, jo vetëm përgjatë këtij viti, por edhe përgjatë vitit të ardhshëm.
Në krahasim me raportin e 2 muajve më parë, të fillim Prillit, Moody`s ka rishikuar në territor pozitiv projeksionet e rritjes ekonomike për vendin tonë gjatë 2017-ës dhe gjatë 2018-ës.
Për këtë vit, rritja ekonomike projektohet në 3.6%, ndërkohë që në raportin e mëparshëm projektohej në 3.5%.
Sa i përket vitit të ardhshëm, Moody`s flet për një normë rritje pranë 3.8%, ndërkohë që dy muaj më parë projektonte një normë rritje në 3.6%.
Projeksionet e agjencisë prestigjioze tashmë i afrohen atyre të Fondit Monetar Ndërkombëtar dhe qeverisë shqiptare, ndërkohë që, gjatë muajve të fundit një sërë institucionesh ndërkombëtare, përfshirë këtu edhe Komisionin Europian kanë rishikuar në rritje ekonominë e vendit tonë. Nga ana tjetër, raporti i fundit i Moody`s thekson se, këto norma rritje do të reflektohen në ekonominë reale.
Agjencia thekson se, prodhimi i brendshëm bruto për frymë gjatë këtij viti do të ngjitet në 4196 dollarë, në rritje të lehtë në krahasim me vitin e kaluar. Vitin e ardhshëm ndërkohë, projektohet të ngjitet me rreth 200 dollarë për frymë, në 4403 dollarë.
Projeksionet e agjencisë për normën e inflacionit dhe borxhin publik ndërkohë kanë ruajtur të pandryshuara në krahasim me raportin e Prillit. Edhe vlerësimi i kreditit, mbetet i pandryshuar, në B1, si në monedhë të huaj, ashtu edhe në monedhën vendase.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.