Ekspertët: Vizatimi që u ble për 30 dollarë në treg të lirë vlen më shumë se 10 milionë dollarë! (FOTO)
Një vizatim i shekullit të 16-të nga një nga figurat kryesore të Rilindjes Gjermane është vlerësuar mbi 10 milionë dollarë pasi u ble fillimisht në një shitje lokale në oborr për vetëm 30 dollarë në 2017.
Sipas Agnews Gallery — shtëpia e ankandeve në Londër në posedim të veprës së artit — Albrecht Dürer, i cili vdiq në 1528, konsiderohet edhe si artisti më i madh gjerman i kohës së tij dhe si një nga artistët dhe intelektualët më të rëndësishëm të Rilindjes Europiane.
Vizatimi që është rizbuluar titullohet “Virgjëresha dhe fëmija”. Duke qenë se karriera dhe trashëgimia e Dürer-it janë studiuar në thellësi që nga vdekja e tij, është jashtëzakonisht e rrallë të gjesh vepra të panjohura të tij dhe Agnews tha në një deklaratë për shtyp se ky vizatim ka qenë “objekt i një interesi të madh që nga rizbulimi i tij”.
Koleksionisti i artit me bazë në Boston, Clifford Schorer, i cili është një konsulent i galerisë, tha se ai hasi në veprën e rrallë të artit, që mendohet se ishte përfunduar në 1503, rastësisht gjatë rrugës për në një festë në Massachusetts në 2019.
Ai kishte harruar të sillte një dhuratë në festë dhe kështu bëri një rrugë të tërthortë në një librari, e cila shiste vëllime të koleksionueshme, rrugës.
Librashitësi i tha atij se shoku i tij kishte një vizatim Dürer dhe e pyeti nëse do t’i hidhte një sy. Schorer ra dakord, por kishte pak shpresë, duke pasur parasysh se hera e fundit që u zbulua një vizatim i panjohur i “kalibrit” nga artisti ishte më shumë se 100 vjet më parë, tha ai.
Vepra e artit ishte blerë në një shitje në oborr në shtëpinë e një arkitekti të cilit i ishte dhuruar veprën nga babai i tij tregtar arti, tha Schorer. Por kur mbërriti për të ekzaminuar veprën e artit javë më vonë, ai u befasua nga cilësia e saj. Schorer tha se i tha pronarit, i cili dëshiron të mbetet anonim: “Unë mendoj se është ose falsifikimi më i madh që kam parë ndonjëherë ose një kryevepër”. CNN
Edel Strazimiri / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.