Eksportet e naftës dhe mineraleve “fryjnë” buxhetin – Në 2 muaj arkëtohen 603 milionë lekë, ministria parashikonte të mblidhte vetëm gjysmat

Buxheti i shtetit ka arkëtuar 603 mln lekë nga taksa e rentës minerare në eksport në 2 muajt e parë të vitit, duke shënuar një rritje të ndjeshme, jo vetëm në raport me të njëjtën periudhë të një viti më parë, por edhe me parashikimet e qeverisë. Sipas të dhënave zyrtare nga Ministria e Financave dhe Ekonomisë, në raport me janar-shkurtin e vitit 2021, të ardhurat nga renta minerare u rritën me 137.6%, ndërsa në raport me planin u arkëtuan 104.4% lekë më tepër.

Kjo rritje e të ardhurave reflekton rritjen e çmimit të naftës, por edhe mineraleve në tregjet ndërkombëtare, duke rritur përfitimet për buxhetin e shtetit. Kjo pasi, kompanitë paguajnë në shtet rentën minerare, që përllogaritet mbi vlerën e tatueshme të të ardhurave nga aktiviteti i nxjerrjes. Për kromin, bakrin dhe hekur-nikelin, ajo është në masën 6%, ndërsa për mineralet e tjerë varion nga 4%-10%.

Ndërkohë që, sa  i takon hidrokarbureve, renta minerare llogaritet duke aplikuar një normë prej 10 për qind të vlerës së tregut të hidrokarbureve (naftë dhe gaz) të nxjerra në territorin e Republikës së Shqipërisë. Të dhënat e fundit të disponueshme, nga Agjencia Kombëtare e Burimeve Natyrore, që i përkasin vitit 2019, tregojnë se nga vendi ynë u eksportua 631.473,6 ton naftë, ndërkohë që prodhimi në këtë vit ishte mbi 1 mln ton.

Sasia më e madhe e naftës është eksportuar në vitet 2013 dhe 2014, duke arritur në mbi 1 mln ton në vit. Ndërkaq, sa i takon mineraleve për vitit 2020, 50% e kësaj takse u arkëtua nga eksporti i mineralit të kromit, ndërsa pas tij renditet guri gëlqeror dhe çimento.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.