Eksportet e patateve kosovare drejt Shqipërisë – Çmimi i lartë referent dëmton prodhuesit

Ministri në detyrë i Financave të Kosovës, Avdullah Hoti, përmes një postimi në rrjetin social Facebook ka denoncuar vendosjen e një çmimi shumë të lartë referent në doganat shqiptar për patatet e importuara nga Kosova.

Duke bashkangjitur një dokument të datës 11 Maj, i cili mban firmën e drejtoreshës së Doganave, Belinda Ikonomi, çmimi referent rezulton të jetë në vlerën 0.18-0.19 euro, çmim ky i konsideruar shumë i lartë nga ministri Hoti.

Sipas Hotit “kjo politikë e qeverisë shqiptare nuk i ndihmon unifikimit të tregut mbarëshqiptar”, por dëmton rëndë prodhuesit kosovarë.

Ai shprehet se ky veprim i palës shqiptare do të shqyrtohet me kujdes, ndërsa Ministria e Tregtisë dhe Industrisë e Kosovës ka marrë menjëherë masa duke kërkuar heqjen e këtij çmimi referent, dhe të vendosen çmimet furnizuese të dëshmuara nga prodhuesit e patates në Kosovë.

Hoti paralajmëron se nëse nuk do të ketë një reagim nga pala shqiptare, atëherë Kosova do të detyrohet të shqyrtojë veprimet e tjera ligjore dhe reciproke për të ruajtur prodhuesit vendas.

Ndërkohë, në faqen online të Doganave të Shqipërisë, çmimi referent për patatet me origjinë nga Kosova shkruhet se është 0.14-0.15 euro.

Patatet me këtë vend origjine kanë një çmim referent shumë më të ulët se ato nga vendet e tjera, për t’u siguruar një vend në tregun shqiptar. Ndikim në këtë çmim të konsideruar si të lartë nga ana e palës kosovare, mund të ketë edhe kursi i këmbimit valutor, ku euroja gjatë Qershorit preku edhe nivelin më të ulët prej Gushtit të vitit 2009.

Në tregjet bujqësore të vendit patatet e vendit tregtohen me një çmim nga 30-42 lekë për kilogram, me çmim shumice.

Për më shumë çmime produktesh, vizitoni faqen e Tregjeve Bujqësore në portalin SCAN.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.