Eksportet gjermane në Britani – Bien në nivelin më të ulët në 6 vite, prej pasigurisë mbi Brexit

Eksportet gjermane në Britani ranë për të katërtin vit radhazi në 2019-ën, sipas të dhënave të zyrës Federale të Statistikave, ndërkohë që Paundi i dobët goditi kërkesën dhe pasiguria mbi rregulloret tregtare pas Brexit ndërprenë zinxhirët e furnizimit.

Eksportet tek partneri i pestë më i madh tregtar i Gjermanisë, ranë me 4.2% në 78.8 miliardë euro, që është niveli më i ulët që prej vitit 2013,  pavarësisht se eksportet totale të Gjermanisë u rritën me 0.8% me bazë vjetore, në nivel rekord të lartë.

Analistët thonë se shkaku kryesor është pasiguria e marrëdhënies tregtare pas vitit 2020, ku do të përfundojë  periudha e tranzicionit.

Britania doli nga Bashkimi Europian në fund të muajit Janar dhe ka kohë deri në muajin Dhjetor të këtij viti për të arritur një marrëveshje tregtare që do të zëvendësojë lëvizjen e lirë të mallrave dhe shërbimeve që Britania ka përfituar deri më tani si vend anëtar.

Marrëdhënia e ardhshme tregtare pritet të ndërpresë disa prej zinxhirëve të furnizimit përtej kufijve, nën të cilët varen shumë industri, nga makinat e deri tek ajo e hapësirës ajrore.

Marrëveshja që do të sigurojë vazhdimin e këtij fluksi mendohet se është e paarritshme brenda 10 muajve që kanë mbetur nga periudha e tranzicionit.

Të dhënat tregojnë se eksportet gjermane të makinave, avionëve, pajisjeve elektronike dhe produkteve farmaceutike kanë rënë.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.