Eksportet shqiptare kanë ‘humbur’ rrugën këtë vit, vetëm dy grupmallra janë në rrugën e duhur! Shifrat
Eksportet shqiptare këtë vit duket se “kanë humbur rrugën”. Nëse i referohemi të dhënave zyrtare të tregtisë së jashtme, në Nëntor 2019 eksportet e mallrave arritën vlerën 25 miliardw lekë, duke u ulur me 9,1 %, në krahasim me të njëjtën periudhë të një viti më parë dhe me 8,6 %, në krahasim me Tetor 2019.
Ndërsa në njëmbëdhjetëmujorin e vitit 2019 (janar-nëntor) eksportet e mallrave arritën vlerën 277 miliardë lekë, duke u ulur me 4,1 %, krahasuar me një vit më parë.
Ndikimin më të madh negativ në eksporte e kanë grupmallrat minerale, lëndë djegëse e energji elektrike, material ndërtimi dhe metale, tekstile dhe këpucë si dhe lëkurë dhe artikujt e tyre.
Por janë dy grupmallra që njohin zhvillim pozitiv.
Referuar të dhënave të INSTAT, Shqipëria ka eksportuar këtë vit më shumë ushqim,pije e duhan si dhe makineri, pajisje dhe pjesë këmbimi.
Në periudhën janar-nëntor, Shqipëria ka eksportuar rreth 32.5 miliard lekë ushqime, pije dhe duhan duke njohur një rritje me 2.8 miliardë lekë krahasuar më të njëjtën periudhë të një viti më parë.
Ndërsa makineri, pajisje dhe pjesë këmbimi Shqipëria ka eksportuar 19.7 miliardë lekë duke njohur një rritje me 3.1 miliardë lekë në krahasim me të njëjtën periudhë të një viti më parë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.