Eksporti i naftës – Arriti në 837 mijë ton vitin e kaluar
Shqipëria eksportoi rreth 837 mijë ton naftë bruto dhe nënprodukte të saj vitin e kaluar. Statistikat tregojnë se eksportet e këtyre produkteve u rritën me 11% për vitin e kaluar dhe arritën sasinë më të madhe të tre viteve të fundit. Megjithatë, konjuktura e çmimeve bëri që të ardhurat nga eksportet e këtyre produkteve të bien ndjeshëm në 33.5 miliardë lekë, 19% më pak krahasuar me vitin 2018.
Eksportet e vajrave minerale dhe nënprodukteve të tyre në Shqipëri mbështeten kryesisht në aktivitetin e industrisë nxjerrëse të naftës bruto në vend.
Në vitet e fundit, tregu kryesor ku eksportohet nafta e nëntokës shqiptare është Spanja. Vitin e kaluar, drejt Spanjës u eksportuan pothuajse 70% e naftës bruto dhe nënprodukteve të saj. Marrëdhënia e Bankers Petroleum me rafineritë spanjolle ekziston prej rreth një dekade, por në dy vitet e fundit sasia e naftës bruto të shitur drejt tyre është rritur edhe më shumë. Gjatë 2019, sasia e naftës bruto të eksportuar në Spanjë arriti në 582 mijë ton, më e larta e regjistruar ndonjëherë drejt këtij vendi. Tregu i dytë më i rëndësishëm për naftën bruto dhe nënkproduktet është Italia, ku vitin e kaluar u eksportuan 103 mijë ton produkte, ose rreth 12% e totalit të eksporteve në këtë kapitull statistikor.
Ersuin Shehu / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.