Eksportuesi i miratuar – Doganat shtojnë lehtësitë për biznesin

Drejtoria e Përgjithshme e Doganave me qëllim zhvillimin e një klime sa më të favorshme për operatorët ekonomikë në drejtim të lehtësimit të procedurave të lëshimit dhe verifikimit të provave të origjinës, reduktimin e kostove administrative dhe kohës së përpunimit të  mjeteve në doganë mund të autorizojë dhënien e statusit të eksportuesit të miratuar.

Një eksportues i miratuar është ai që në kushte të caktuara i është lejuar nga Autoritet Doganore të bëjë vetë vërtetimin e origjinës nëpërmjet Deklaratave-Faturë pavarësisht nga vlera.

Autoritetet doganore mund t’ia japin eksportuesit këtë status, por ata gjithashtu mund të tërheqin dhënien e tij, nëse eksportuesi keqpërdor autorizimin. Procedura për dhënien e statusit “Eksportuesi i miratuar” është e përcaktuar nga autoritetet doganore shqiptare mbi bazë të një rregulloreje të posaçme.

Eksportuesit që kërkojnë të pajisen me këtë status duhet të plotësojnë një formular tip aplikimi.

Dhënia e këtij statusi nënkupton që kompanitë, të cilat plotësojnë kushtet e përcaktuara në dispozitat e origjinës të marrëveshjeve ndërkombëtare, të cilat janë lidhur nga Republika e Shqipërisë, mund të provojnë origjinën preferenciale të mallrave të tyre në eksport.

Por për të marrë këtë “titull” eksportuesi duhet të plotësojë dhe një sërë kriteresh si:

a) Të ketë eksportuar mallra me origjinë preferenciale, me prova të origjinës preferenciale për një periudhë prej minimumi dy vjet nga data e kërkesës;

b) Të ketë një frekuencë prej minimumi 1 ngarkese për eksport në muaj ose 12 eksporte në vit;

c) Të paraqesë dokumentacionin e nevojshëm për të vërtetuar statusin e origjinës së mallrave;

ç) Të lejojë inspektimin e llogarive financiare si dhe çdo kontroll dokumentar dhe fizik që konsiderohet i nevojshëm nga autoritetet doganore lidhur me provat e origjinës;

d) Të ketë të punësuar të paktën një punonjës që ka njohuri mbi rregullat e origjinës;

dh)Të mos ketë pasur asnjë rast të kontestuar për provat e origjinës, të përdorura prej tij në eksport nga doganat homologe gjatë dy viteve nga data e kërkesës

e) Në momentin e aplikimit për marrjen e statusit të “Eksportuesit të Miratuar” të mos ketë asnjë detyrim doganor të papaguar.

Violeta Shqalsi/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.