Ekuadori kërkon ndihmë – “Duhen $550 mln që të menaxhojmë fluksin e refugjatëve nga Venezuela”
Ekuadorit i duhen rreth 550 milionë dollarë për t`i dhënë ndihmën e duhur emigrantëve që vijnë nga Venezuela. Këta të fundit po largohen masivisht nga vendi i tyre si rrjedhojë e krizës së rëndë ekonomike që ka goditur vendin, me inflacionin me shumë zero tashmë, dhe me produktet bazë që mungojnë nëpër dyqane, e madje edhe me naftën që po mungon. Qeveria e Ekuadorit është ndër ato që i ka hapur dyert për fqinjët e saj, por kërkon ndihmë pasi nuk mund t`ia dalë e vetme.
Kjo ndihmë mund të vijë shumë mirë nga organizmat shumëpalëshe, si Organizata e Kombeve të Bashkuara, e përfshirë gjerësisht në çështje që i takojnë emigrantëve dhe refugjatëve. Kriza e refugjatëve nga Venezuela vlerësohet si mjaft e rëndë nga vetë OKB, madje e përmasave të njëjta me ata nga Lindja e Mesme, e disa viteve më parë. Vendet e Amerikës Latine janë takuar në fund të javës në Quito, për të diskutuar plane të koordinuara për menaxhimin e situatës.
Ekuadori vlerëson se gjatë 2018-ës kanë hyrë në vend 600 mijë qytetarë nga Venezuela, pjesa dërrmuese të cilëve vazhdojnë rrugën për në Peru. OKB vlerëson se që prej vitit 2015, 3 milionë njerëz kanë braktisur vendin.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.