Elektrifikimi i transportit urban. Hapet tenderi 74.1 mln lekë, studim fizibiliteti për Tiranën, Durrësin dhe Vlorën
Agjencia për Eficencën e Energjisë do të realizojë studimin e fizibiletit mbi elektrifikimin e linjave të transportit urban dhe ndërqytetas në Bashkitë Tiranë, Vlorë dhe Durrës. Ky dikaster ka hapur tenderin me një fond limit prej 74.1 mln lekë, ndërsa argumenton se qëllimi i studimit është përmirësimi i eficencës së energjisë në transportin urban dhe ndërqytetas, duke ndikuar në reduktimin e gazeve me efekt serrë dhe në koston e operimit.
Sipas dokumenteve të tenderit, sektori i transportit është një nga kontribuesit kryesorë të ndotjes së ajrit, duke zënë 25% të emetimeve të gazeve me efekt serrë në Bashkimin Evropian, teksa në Tiranë luan një rol të madh në përqendrimet e ndotjes, duke ndikuar në shëndetin publik. Ndërkaq, kompania fituese e tenderit do të duhet të realizojë studimin e fizibilitetit, si dhe testimin e teknologjive të reja të autobusëve elektrikë, me qëllim identifikimin e sistemit më të përshtatshëm për zonat urbane të Tiranës (linja/t urbane më e/të përshtatshme) dhe ato interurbane (linja ndërqytetase Tiranë-Durrës, Tiranë-Vlorë).
Gjithashtu, do të realizohet studim i fizibiliteti për vendosjen e pikave më të përshtatshme të karikimit, duke marrë në konsideratë itinerarin e ndjekur dhe lloji i karikimit (plug in, wireless etj). Ndërkaq, pjesë e projektit të Agjencisë së Eficencës së Energjisë do të jetë edhe implementimi i autobusëve elektrikë në zonat urbane, si dhe në linjat ndërqytetase, përkatësisht Tiranë-Durrës, Tiranë-Vlorë si dhe ngritja e kapaciteteve dhe trajnime të ndryshme për një operim sa më eficent dhe të qëndrueshëm të sistemit elektrik të autobusëve.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.