Emergjenca e energjisë, deri më 15 prill 2022 – Hyn në fuqi vendimi i qeverisë. Kompanitë publike të energjisë pezullojnë investimet
Përmes vendimit të marrë në datën 8 tetor, Këshilli i Ministrave shpalli gjendjen e emergjencës në furnizimin me energji elektrike, duke urdhëruar kompanitë publike të pezullojnë planet e investimeve. Sipas vendimit, që është publikuar në Fletoren Zyrtare, gjendja e emergjencës do të zgjatë deri në datën 15 prill, ndërkohë që Korporata Elektroenergjetike Shqiptare, Operatori i Sistemit të Transmetimit dhe kompanitë që janë pjesë e OSHEE Group do të pezullojnë planet e investimeve, përveç investimeve të domosdoshme për ushtrimin e veprimtarisë.
Gjithashtu, këto shoqëri do të duhet të koordinojnë ushtrimin e aktivitetit, në përputhje me udhëzimet e ministrit të Infrastrukturës dhe Energjisë, me qëllim garantimin e pandërprerë të energjisë elektrike. Paralelisht, vendimi parashikon ngritjen e grupit ndërinstitucional për menaxhimin e emergjencës në furnizimin me energji elektrike, që do të drejtohet nga zëvendëskryeministri, Arben Ahmetaj dhe do të ketë në përbërje ministrin e Infrastrukturës dhe Energjisë, ministrin e Financave dhe Ekonomisë dhe çdo përfaqësues nga institucione të tjera, që vlerësohen të nevojshëm nga Ahmetaj.
Gjithashtu, vendimi ngarkon ministrin e Financave dhe Ekonomisë, që të sigurojë mekanizmat e duhur financiarë, me qëllim mundësimin e importit të energjisë për sigurimin e furnizimit të pandërprerë të energjisë elektrike. Aktualisht, Enti Rregullator i Energjisë po analizon aplikimet e bëra nga Operatori i Sistemit të Shpërndarjes dhe Operatori i Sistemit të Transmetimit, për rritjen e tarifave të transmetimit dhe shpërndarjes, por ende nuk ka marrë vendim nëse do të fillojë procedurat për shqyrtimin e tyre”. Gjithçka u bë me dije nga kreu i Entit Rregullator të Energjisë, Petrit Ahmeti i cili tha për TV SCAN se vendimmarrja është kolegjiale dhe i takon Bordit.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.