Emergjencat civile “në pikë të hallit” – KLSH: Agjencia pa strategji, pa sistem alarmi në kohë reale, madje pa sallë operative
Ndërsa Agjencia Kombëtare e Mbrojtjes Civile duhet të ketë rol të dorës së parë duke parë fatkeqësitë e njëpasnjëshme, siç qenë tërmetet apo Pandemia, Kontrolli I Lartë I Shtetit përshkruan një situatë mjaft të zymtë të këtij institucioni. Agjencia as që ka një strukturë apo sistem të konsoliduar dixhital për monitorimit dhe lajmërimit në kohë reale të fatkeqësive, nuk zotëron raporte të administrimit të incidenteve, problemeve dhe disponueshmërisë, madje nuk ka as një sallë të posaçme për koordinimin dhe operacionet.
Nga auditimi u konstatua se AKMC nuk disponon apo administron sisteme të teknologjisë së informacionit dhe infrastrukturë network-u të sajën. Pajisjet fizike që disponon AKMC (PC, printer, router), janë pjesë e infrastrukturës së Ministrisë së Mbrojtjes dhe funksionojnë si pjesë e rrjetit të brendshëm të Ministrisë së Mbrojtjes, ndërkohë që akoma nuk është draftuar/ hartuar apo miratuar, Strategjia Kombëtare për Zvogëlimin e Riskut nga Fatkeqësitë.
Nga ana e audituesve të KLSH u konstatua mungesa e vlerësimit kombëtar të riskut, i cili përfshin një vlerësim të klasifikuar të rreziqeve që mund të ndodhin në vend gjatë viteve të ardhshme, për të ndihmuar autoritetet përgjegjëse për të informuar, planifikuar dhe përgatitur mbi ngjarjet e ndryshme.
“AKMC nuk disponon protokolle komunikimi të dokumentuara sipas ngjarjeve të caktuara që përcakton ligji, të cilat lidhen me dukuri natyrore ekstreme si: tërmetet, përmbytjet dhe vërshimet e ujit, temperaturat ekstreme dhe të tej zgjatura, rrëshqitjet arkitektonike, ortekët, erërat e forta në tokë dhe në det, zjarret masive në pyje, sëmundjet infektive masive dhe dukuri të tjera që ndikojnë në jetën e njerëzve, gjënë e gjallë, pronën, trashëgiminë kulturore dhe mjedisin”, konkludon në raport Kontrolli I Lartë I Shtetit.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.