Emigrimi masiv nga Afrika, përfitojnë agjencitë e dërgimit të parave – Remitancat në nivele rekord
Që nga viti 2010, popullsia emigrante me origjinë nga Afrika është rritur ndjeshëm në të gjithë botën. Aq shpejt saqë 8 nga 10 popullsitë emigrante me rritjen më të shpejtë nga nga kombe të Afrikës sub-Sahariane.
Pjesa më e madhe e bisedës së emigrimit, sidomos kur bëhet fjalë për afrikanët, lidhet me ngjarjet e tmerrshme të raportuara nga Libia dhe kalimi vrastar i Mesdheut. Përgjithësisht bëhet fjalë për njerëz që kërkojnë një jetë më të mirë në një mjedis të ri.
Por nga një pikëpamje ekonomike, ritmi i shpejtë i emigracionit ka një interes të madh. Kjo vlen veçanërisht për industrinë e transferimit të parave. Remitancat drejt Afrikës sub-Sahariane u rritën në 37.8 miliardë dollarë në vitin 2017.
Banka Botërore parashikon se këto dërgesa do të kapin shifrën e 39.2 miliardë dollarëve këtë vit, ndërsa do të rriten edhe në 2019.
Ekonomia më e madhe e këtij rajoni, Nigeria, kryeson edhe listën e marrësve me 22.3 miliardë dollarë në vitin 2017. Ndërsa Liberia ishte shteti afrikan ku remitancat zinin pjesën më të madhe të PBB me rreth 25.9%.
Por teksa fokusi kryesor është tek emigrantët në vendet e Perëndimit, një numër i madh njerëzish lëvizin edhe brenda Afrikës. Një nga sfidat më të mëdha me të cilat përballen ata që kanë lëvizur drejt një shteti tjetër në Afrikë është mungesa e infrastrukturës që t’u lehtësojë atyre shkëmbimin e parave me vendet fqinje.
Në fakt, Afrika ka kostot më të larta të remitancave në botë. Nëse në botë kostoja për dërgimin e 200 dollarëve është mesatarisht 7.2 dollarë, në Afrikë kjo kosto arrin në 9.1 dollarë.
Për këtë arsye, një numër i madh kompanish po përpiqen të zgjidhin përmes përparimeve teknologjike këtë problem të tranfertave miliarda dollarëshe të parave mes vendeve të Afrikës. Përmes aparatëve celularë, është lehtësuar opsioni i transfertës dhe emigrantët po fillojnë të dërgojnë shuma më të vogla në mënyrë më të shpeshtë, falë aplikacioneve, parasë digjitale dhe llogarive tradicionale bankare.
Përveçse lehtëson procesin, teknologjia gjithashtu rrit transparencën në gjëra si normat e këmbimit, çfarë ka një impakt të ndjeshëm dhe inkurajon më shumë qarkullim parash mes vendeve.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.