“Energji nga anijet, kosto të larta e ndotje ekstreme” – Procedura e KESH, çmimi “mister”. Sevdari: Europa s’e përdor më këtë teknologji
Prodhimi i energjisë elektrike nga anije lundruese me gasoil dhe mazut është një teknologji që nuk përdoret më në Evropë për shkak të ndotjes tejet të lartë që gjeneron. Kristian Sevdari, doktorant në energjitë e rinovueshme komenton vendimin e qeverisë për të marrë me qira një impiant të tillë, duke theksuar se përveç ndotjës, problem është dhe kosto e lartë e prodhimit të energjisë.
Sevdari flet dhe për rëndësinë që ka zhvillimi i energjisë fotovoltaike dhe eolike, që do të sillnin prodhimin e energjisë me kosto të ulta e do të ulnin varësinë që vendi ynë ka nga importi.
Paralelisht, ai ndalet dhe te rëndësia që ka instalimi i paneleve fotovoltaike për vetëprodhimin e energjisë për qëllime autokonsumatore, duke theksuar edhe benefitet që do të sillte instalimi i tyre në drejtim të reduktimit të humbjeve të energjisë në rrjetin e shpërndarjes.
2 ditë më parë ministrja e Infrastrukturës dhe Energjisë njoftoi se është nënshkruar kontrata me 2 kompanitë fituese në garën e hapur nga Korporata Elektroenergjetike Shqiptare për marrjen me qira për një periudhë 2-vjeçare të 2 anijeve që do të vendosen në afërsi të TEC-it të Vlorës.
Sipas termave të referencës për gjenerimin e energjisë do të përdoret karburant i lëngshëm, si gasoil ashtu edhe mazut/solar, por ndërkohë ende nuk është publikuar çmimi i qirasë që do të paguajë KESH, si dhe çmimi i energjinë që do prodhohet nga këto impiante. Që prej datës 17 shkurt, ku u bë njoftimi i fituesve, TV SCAN ka kërkuar informacion pranë KESH në lidhje me qiranë dhe çmimin, por deri më tani ai nuk është vënë në dispozicion.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.