Era Xhabafti:”Femrat duhet të jenë më bashkëpunuese me njëra tjetrën”
E ftuar në panelin e ‘’Argument’’, të enjten në mbrëmje ishte dhe sipërmarrësja Era Xhabafti, për të folur rreth vështirësive që ka një grua sipërmarrëse.
Çështja në të cilën u ndal më tepër Xhabafti ishte rëndësia e gruas në shoqëri dhe jo vetëm në biznes. Sipas saj femrat janë aset i shoqërisë, pasi janë shumë të rëndësishme si nga ana sociale por dhe nga ajo ekonomike. Ajo theksoi se femra sot inkurajohet për të pasur vendimmarrje.
I pyetur nga gazetari Enio Civici sesi ia dalin gratë sipërmarrëse me menaxhimin e kohës, ajo u shpreh se ‘’koha është balancuar midis partnerëve, pasi tashmë dhe meshkujt kanë filluar të shpenzojnë më shumë kohë në familje si dhe në rritjen e fëmijëve, duke i dhënë kështu më shumë kohë grave për t’u marrë me aspektin profesional.’’
Përsa i përket pjesës së pagesës, sipas saj femrat paguhen më pak sepse nuk kanë pretendime aq sa meshkujt dhe kënaqen me postin që mund t’iu besohet dhe vlerësimit që iu jepet duke u mjaftuar me një pagë më të ulët sesa ajo e gjinisë tjetër. Sipërmarrësja Xhabafti, u shpreh se nëse femrat do të kishin më shumë vetëbesim por dhe më shumë bashkëpunim më njëra tjetrën, do të ishin akoma dhe më shumë të suksesshme.
E.Z/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.