Ere, 216 mln lekë nga pagesat rregullatore – Miratohen tarifat për tregun e energjisë, kush nuk paguan në kohë ka penalitete
Enti Rregullator i Energjisë synon të mbledhë rreth 216 mln lekë nga pagesat rregullatore për vitin 2020 nga subjektet e licencuar në sektorin e energjisë elektrike dhe gazit natyror. Përmes një vendimi të javës që shkoi ky dikaster ka përcaktuar tarifat për secilin subjekt, teksa në total numërohen 304 të licencuar, të cilët janë subjekt i pagesave rregullatore.
Përllogaritja e këtyre pagesave është bërë mbi të ardhurat e realizuara nga aktiviteti i licencuar, ndërkohë që në rast të mungesës së pasqyrave financiare janë përdorur të tjera publikime zyrtare të bëra pranë Qendrës Kombëtare të Biznesit. Këto subjekte duhet të kryejnë pagesat rregullatore ndaj ERE, jo më vonë se 30 ditë nga botimi në Fletoren Zyrtare i vendimit, pasi në të kundërt do të aplikohen penalitete.
Më konkretisht, legjislacioni në fuqi përcakton ndëshkimin me gjobë deri në 3 për qind të të ardhurave të vitit paraardhës të të licencuarit,si dhe ka të drejtë të aplikojë një kamatëvonesë mbi vlerën e pagesës rregullatore, në masën e 0.2 % të xhiros ditore për çdo ditë vonesë në pagesën e saj. Në përllogaritjen e pagesave rregullatore të këtij viti ka pësuar ndryshime niveli i pagesës për shoqëritë e licencuara në aktivitetin e prodhimit të energjisë elektrike, furnizimit dhe tregtimit të energjisë elektrike dhe gazit natyror që në vitin paraardhës nuk kanë pasur aktivitet.
Kjo në bazë të rregullores së re, që për këtë kategori përcaktoi se pagesa rregullatore do të jetë një shumë fikse prej 100 mijë lekësh, duke pësuar një rritje prej 60 mijë lekësh apo 60% më shumë nga tarifat e mëparshme.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.