ERE: Fashat e energjisë rritën vjedhjet dhe abuzimet në faturim – Relacioni: Skema synonte uljen e konsumit, jo mbrojtjen e të varfërve, por nuk funksionoi
Vështirësi në faturim, abuzime nga kompania dhe rritje e ndjeshme e humbjeve joteknike”. Këto ishin konstatimet e Entit Rregullator të Energjisë në relacionin e vitit 2014, kur pas kërkesës së Operatorit të Shpërndarjes së Energjisë Elektrike, u vendos heqja e faturimit me 2 fasha të energjisë elektrike. Teksa 1 ditë më parë, kryeministri Edi Rama paralajmëroi se do të kërkojë rikthimin e kësaj skeme faturimi, TV SCAN zbardh argumentet e 7 viteve më parë, që sollën heqjen e faturimit me 2 blloqe për konsumatorët familjarë, e kundërshtuar në atë kohë edhe nga vetë OSHEE. Në dokument ERE vëren se ekzistenca e fashave ka pasur ndikim të ndjeshëm në rritjen e nivelit te humbjeve joteknike të kompanisë.
Humbjet joteknike përfshijnë kryesisht vjedhjet e energjisë, ndërsa paralelisht sipas ERE-s aplikimi i tarifës me dy blloqe rriti abuzimin nga ana e kompanisë, duke çuar në rritjen e numrit të ankesave nga familjarët për faturat e energjise elektrike, që mesatarisht ishin rreth 50 000 çdo vit. Por, përveç këtyre argumenteve edhe vetë OSHEE, mendonte “se përfshirja e komponentit fiks tarifor, duke pasur parasysh pagesën për fuqi të instaluar bazuar në praktikat dhe standardet europiane dhe botërore do të ishte një ndihmesë shumë e madhe në përmirësimin e menaxhimit të kompanisë, duke ndihmuar njëkohësisht rritjen e transparencës për publikun”. Po ashtu, OSHEE mendonte se “shteti mund dhe duhet të gjejë elementë të tjerë të drejtpërdrejtë për të rimbursuar shtresat në nevojë”.
Gjithsesi, në relacion ERE shpjegonte se vendosja e fashave, në vitin 2008 nuk pati për qëllim mbrojtjen e shtresave në nevojë, e cila nuk është përgjegjësi ligjore e ERE-s, por ishte projektuar si një masë e eficencës për energjinë. “Me fjalë të tjera, vendosja e tarifave me blloqe kishte si qëllim dekurajimin e përdorimit të energjisë elektrike për ngrohje dhe konsumatorët t’i drejtoheshin burimeve të tjera të energjisë për këtë qëllim”,-thuhej ndër të tjera në relacion, ndërsa shtohej se duke mbajtur parasysh konstatimet, tarifa me blloqe konsumi e projektuar si një masë eficence nuk funksionoi si e tillë. “Për më tepër krijoi probleme për kompaninë dhe gjithashtu për konsumatorët familjarë”,-shtohej në dokument.
Nga Kongresi i Partisë Socialiste, Rama deklaroi se “Shumë shpejt do të vendosim një çmim tjetër të energjisë elektrike për ata që harxhojnë më shumë se sa masa tjetër e popullit sepse janë më të pasur”. Megjithatë, referuar legjislacionit në fuqi, tarifat e energjisë elektrike nuk vendosen nga qeveria, por nga Enti Rregullator i Energjisë, që është një institucion i pavarur.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.